अखेर छगन भुजबळ मंत्रिपदाची शपथ घेणार… धनंजय मुंडेंचं खाते त्यांच्याकडे येण्याची शक्यता !

MH 28 News Live : महाराष्ट्राच्या राजकारणात पुन्हा एकदा मोठा उलथापालथ होण्याची शक्यता आहे. उपमुख्यमंत्री अजित पवार यांच्या नेतृत्वाखालील राष्ट्रवादी काँग्रेस पक्षाचे ज्येष्ठ नेते आणि माजी मंत्री छगन भुजबळ हे उद्या सकाळी १० वाजता मुंबईतील राजभवनावर शपथ घेण्याची शक्यता वर्तवली जात आहे.

सूत्रांच्या माहितीनुसार, उद्याचा शपथविधी सोहळा राजभवनात पार पडणार असून भुजबळ यांना मंत्रिमंडळात स्थान दिलं जाणार आहे. मागील काही महिन्यांपासून भुजबळ नाराज होते. अपेक्षित महत्त्व न मिळाल्यामुळे त्यांनी अनेक वेळा नाराजी व्यक्त केली होती. आता त्यांच्या नाराजीनंतर सरकारने त्यांना मंत्रिपद देण्याचा निर्णय घेतल्याचं बोललं जात आहे.

यात आणखी एक महत्त्वाची गोष्ट म्हणजे, भुजबळ यांच्याकडे धनंजय मुंडे यांचं महत्त्वाचं खाते सोपवलं जाऊ शकतं, अशी शक्यता देखील व्यक्त केली जात आहे. राष्ट्रवादीचे ज्येष्ठ नेते असूनही भुजबळ यांना आतापर्यंत महायुतीच्या मंत्रिमंडळात स्थान मिळालं नव्हतं. त्यामुळे त्यांच्या नाराजीची चर्चा सातत्याने रंगत होती. आता त्यांना मंत्रिपद देऊन नाराजी संपवण्याचा सरकारचा प्रयत्न असल्याची खात्रीलायक माहिती सूत्रांकडून मिळते आहे.