भीमाशंकर दर्शनासाठी आलेल्या भाविकांचा अपघात; मलकापूर तालुक्यातील १७ जण जखमी

MH 28 News Live / मलकापूर : तालुक्यातील देवढाबा येथून श्री क्षेत्र भीमाशंकर दर्शनासाठी आलेल्या भाविकांच्या पिकअप गाडीचा ब्रेक फेल झाल्याने बुधवारी (३ सप्टेंबर) सकाळी साडेअकराच्या सुमारास भीषण अपघात झाला. घोडेगाव-भीमाशंकर रस्त्यावरील पोखरी (ता. आंबेगाव) गावाजवळ हा प्रकार घडला असून अपघातात १७ भाविक जखमी झाले आहेत.

३१ ऑगस्ट रोजी देवढाबा येथून २१ भाविकांचा समूह वणी, नाशिक, शिर्डी, शनिशिंगणापूर, जेजुरी व आळंदी येथे दर्शन घेऊन भीमाशंकरकडे निघाला होता. मात्र, धोकादायक वळणावर गाडीचा ब्रेक फेल झाल्याने चालकाचे नियंत्रण सुटले व वाहन पलटी झाले.

जखमींमध्ये पिकअप चालक प्रभाकर सुधाकर बोरसे (२४), आविष गणेश कवळे (१२), ज्योती गणेश कवळे (३८), निर्मला भागवत बोरसे (६०), ज्ञानेश्वर सपकाळ (६५), सुनीता संदीप कवळे (४०), कल्पना विजय कवळे (४५), शोभा श्रावण बोरसे (५५), सूर्यकांत डवले (४५), शारदा भास्कर जांभे (४०), मुक्ताबाई साबळे (५५), उषा सूर्यकांत डवले (४४), मंदाबाई सुपदा फदले (५०), सूर्यकांत दगडू डवले (४५), सुनिता संजय सपकाळ (४७) व शारदाबाई भास्कर जांभे (५०) यांचा समावेश आहे. सुदैवाने चार भाविकांना कोणतीही दुखापत झाली नाही.

अपघातानंतर स्थानिक ग्रामस्थ व प्रवासी भाविकांनी तत्काळ धाव घेऊन जखमींना मदत केली. शासकीय रुग्णवाहिकांद्वारे सर्व जखमींना मंचर उपजिल्हा रुग्णालयात दाखल करण्यात आले.

पिकअप चालक प्रभाकर बोरसे यांनी सांगितले, “वळणावर अचानक ब्रेक फेल झाला. वाहन नियंत्रित करण्याचा प्रयत्न अयशस्वी ठरला. स्थानिक ग्रामस्थ व भाविकांनी दिलेल्या मदतीमुळे धैर्य मिळाले.”

मंचर उपजिल्हा रुग्णालयात वैद्यकीय अधीक्षक डॉ. शिवाजीराव जाधव यांच्या मार्गदर्शनाखाली डॉ. राहुल खेमणार, डॉ. विवेकानंद फसाले, डॉ. अश्विनी गोरे व डॉ. विनोद कानगुले यांच्या टीमने उपचार केले. रुग्णालयाकडून जखमींना जेवण व नाश्ता उपलब्ध करून देण्यात आला. “सर्वांची प्रकृती स्थिर असून उपचारानंतर ते लवकरच घरी जाऊ शकतील,” असे डॉ. जाधव यांनी सांगितले.