चिखलीत आमदाराच्या गाडीची धडक; तरुण गंभीर जखमी, कोमात

MH 28 News Live / चिखली : आज सकाळी दहाच्या सुमारास अमरावती विभागाचे शिक्षण आमदार किरण सरनाईक (रा. वाशीम) यांच्या इनोव्हा गाडीने पायी जाणाऱ्या कृष्णा नंदू लष्कर (वय २५, रा. गौरक्षण वाडी, चिखली) या तरुणाला पानगोळे हॉस्पिटलसमोर जोरदार धडक दिली. या अपघातात कृष्णा गंभीर जखमी होऊन कोमात गेला असून तातडीने त्याला जवंजाळ हॉस्पिटल, चिखली येथे दाखल करण्यात आले आहे.

मिळालेल्या माहितीनुसार, आमदार सरनाईक हे त्या वेळी बुलढाण्यातील डॉ. राजेंद्र शिंगणे यांच्या निवासस्थानी सातव्या पर भेटीसाठी निघाले होते. अपघातानंतर सरनाईक यांनी स्वतःच जखमी युवकास गाडीत बसवून जवंजाळ हॉस्पिटलमध्ये नेले. मात्र या घटनेने परिसरात प्रचंड संतापाची लाट उसळली आहे. घटनेच्या पार्श्वभूमीवर नागरिकांनी राजकारण्यांच्या व अधिकाऱ्यांच्या गाड्यांचा वेग नियंत्रित ठेवण्याची मागणी केली असून, अशा अपघातग्रस्तांना तातडीने मदत व जबाबदारी निश्चित करण्याचे आवाहन केले आहे. दरम्यान, पोलिसांनी पंचनामा सुरू केला आहे.