रिझर्व बॅंकेकडे आहे एवढा मोठा सोन्याचा साठा आकडा वासून थक्क व्हाल
MH 28 News Live : देशाच्या आर्थिक स्थैर्याचा एक महत्त्वाचा पाया असलेला रिझर्व्ह बँकेचा सोन्याचा साठा सप्टेंबर अखेरीस तब्बल ८८०.१८ मेट्रिक टनांपर्यंत वाढल्याची माहिती समोर आली आहे. मागील महिन्याभरात या साठ्यात २५.४५ मेट्रिक टनांची भर पडली असून, हे देशाच्या चलनसाठ्यातील मजबूत आर्थिक संकेत मानले जात आहेत. सप्टेंबर २०२४ अखेरीस हा साठा ८५४.७३ मेट्रिक टनांवर होता, म्हणजेच चालू आर्थिक वर्षाच्या पहिल्या सहामाहीत सुमारे तीन टक्क्यांची प्रभावी वाढ झाली आहे.
रिझर्व्ह बँकेच्या मालकीतील एकूण सोन्यापैकी ५७५.८२ मेट्रिक टन सोने भारतात सुरक्षितरीत्या ठेवण्यात आले आहे, तर २९०.३७ मेट्रिक टन सोने बँक ऑफ इंग्लंड आणि बँक फॉर इंटरनॅशनल सेटलमेंट्सकडे सुरक्षित ठेवले आहे. त्याचबरोबर १३.९९ मेट्रिक टन सोने ठेवींच्या स्वरूपात ठेवण्यात आले असल्याची माहिती आर्थिक वृत्तांतात देण्यात आली आहे.
मूल्याच्या दृष्टीने पाहता, देशाच्या एकूण परकीय चलनसाठ्यात सोन्याचा वाटा लक्षणीयरीत्या वाढला आहे. मार्च २०२५ अखेरीस हा वाटा ११.७० टक्के इतका होता, तर सप्टेंबर अखेरीस तो वाढून १३.९२ टक्क्यांपर्यंत पोहोचला आहे. हे वाढते प्रमाण देशाच्या सोन्यातील गुंतवणुकीबाबत रिझर्व्ह बँकेची धोरणात्मक भूमिका अधोरेखित करते.
दरम्यान, सप्टेंबर २०२५ अखेरीस देशाचा एकूण परकीय चलनसाठा किरकोळ घटून ७००.०९ अब्ज डॉलर झाला आहे, तर सप्टेंबर २०२४ अखेरीस तो ७०५.७८ अब्ज डॉलर इतका होता. तरीही, सोन्याच्या साठ्यातील वाढ ही भारताच्या आर्थिक शक्तीचा आणि आंतरराष्ट्रीय विश्वासार्हतेचा स्पष्ट पुरावा मानली जात आहे.
या वाढत्या सुवर्णसाठ्यामुळे रिझर्व्ह बँकेच्या चलन धोरणाला अधिक मजबुती लाभणार असून, जागतिक आर्थिक अस्थिरतेच्या पार्श्वभूमीवर भारताच्या आर्थिक संरक्षण कवचाची झळाळी आणखी वाढली आहे.
