भक्त बनून लुटले! शेगावात देवदर्शनासाठी गेलेल्या कुटुंबाला ७ लाखांचा गंडा !!

MH 28 News Live / शेगाव : पवित्र शेगाव नगरी… जिथे लाखो भाविक आपल्या श्रद्धाळू अंतःकरणाने दर्शनासाठी येत असतात. याच पवित्र भूमीत एका कुटुंबाला असा कटू अनुभव आला, ज्याने त्यांच्या देवदर्शनाच्या आनंदावर पाणी फेरले. भक्त निवासात रूम बुक करण्याच्या साध्या बहाण्याने एका कुटुंबाची तब्बल सात लाख २२ हजार रुपयांची ऑनलाईन फसवणूक झाली आहे! ही धक्कादायक घटना देहूरोड येथे २७ ते २९ एप्रिल दरम्यान घडली, ज्यामुळे परिसरात एकच खळबळ उडाली आहे.

देहूरोडचे रहिवासी असलेले ४१ वर्षीय राहूल अशोकराव पाठक यांनी १६ मे रोजी या घृणास्पद फसवणुकीबाबत देहूरोड पोलीस ठाण्यात तक्रार दाखल केली आहे. पोलिसांनी सतीश शर्मा नावाचा संशयित आणि त्याच्या दोन साथीदारांविरुद्ध गुन्हा नोंदवला आहे.

पोलिसांनी दिलेल्या माहितीनुसार, फिर्यादी पाठक आपल्या कुटुंबासोबत शेगावला श्री गजानन महाराजांच्या दर्शनासाठी उत्सुक होते. त्यांनी भक्त निवासातील सोयीस्कर रूम बुक करण्यासाठी इंटरनेटवर शोध घेतला. याच दरम्यान, त्यांना एका संशयास्पद वेबसाईटवरील दोन मोबाईल क्रमांकांवर संपर्क साधण्याचा मोह आवरला नाही. याच ठिकाणी त्यांच्यासोबत मोठा खेळ खेळला गेला.

सतीश शर्मा नावाच्या एका धूर्त व्यक्तीने स्वतःला भक्त निवासाचा प्रतिनिधी भासवले आणि पाठक यांना एसी रूम बुकिंगच्या जाळ्यात ओढले. वेगवेगळ्या युपीआय कोडच्या माध्यमातून त्याने पाठक यांच्याकडून तब्बल सात लाख २२ हजार रुपये उकळले. रक्कम हातात येताच या ठगबाजांनी संपर्क तोडला आणि पाठक यांच्या विश्वासाचा अक्षरशः चुराडा केला. आपली आयुष्यभराची कमाई फसवणूक्यांच्या हाती गेल्याने पाठक आणि त्यांचे कुटुंब पूर्णपणे हताश झाले आहेत.

आता या फसवणुकीच्या प्रकरणाचा तपास पोलीस निरीक्षक विजयकुमार वाकसे करत आहेत. प्रश्न हा आहे की, या सायबर ठगांना पोलीस कधी बेड्या ठोकणार? आणि देवदर्शनासाठी गेलेल्या या कुटुंबाला त्यांचा न्याय कधी मिळणार ? या थरारक फसवणूक प्रकरणाचा पुढील तपास काय निष्कर्ष देतो, हे पाहणे महत्त्वाचे ठरणार आहे.