हिंदू देवतांच्या अपमानाबद्दल उच्च न्यायालयाने घेतले ट्विटरच्या कानाचे माप…
MH 28 News Live : हिंदू देवतेचा अपमान करणाऱ्याला ब्लॉक का करू शकत नाही ? अशा शब्दांत दिल्ली उच्च न्यायालयाने ट्विटरला फटकारलं आहे. जर ट्विटर डोनाल्ड ट्रम्पना ब्लॉक करू शकतं, तर ट्विटरसाठी ही गोष्ट काय कठीण आहे, असेही उच्च न्यायालय यावेळी म्हणाले.
एथिस्ट रिपब्लिक नावाच्या एका ट्विटर अकाउंटवर काली मातेचं एक आक्षेपार्ह चित्र पोस्ट करण्यात आलं होतं. त्या पोस्ट विरोधात आदित्य सिंग देशवाल यांनी दिल्ली उच्च न्यायालयात धाव घेत या हँडलवर कायमची बंदी आणण्याची मागणी करणारी याचिका दाखल केली होती.
या याचिकेवर दिल्ली उच्च न्यायालयाचे कार्यवाहक मुख्य न्यायमूर्ती विपीन सांघी यांच्या अध्यक्षतेखालील खंडपीठासमोर सुनावणी पार पडली. त्यावेळी याचिकाकर्ते देशवाल यांनी या याचिकेतून संबंधित अकाउंटवर फक्त हिंदूच नव्हे तर इतरही धर्मांबाबत आक्षेपार्ह आशय पसरवला जातो. त्यामुळे त्यांना कायमस्वरूपी बंदी घालावी अशी मागणी केली. त्यावर प्रतिवादी म्हणून ट्विटरतर्फे सिद्धार्थ लूथरा यांनी बाजू मांडली.
ट्विटर हे माध्यम न्यायालयीन आदेशांशिवाय अशा प्रकारच्या अकाउंट्सवर कारवाई करत नाही, असा युक्तिवाद लूथरा यांनी केला. त्यावर बोलताना खंडपीठ म्हणालं की, तुम्ही जर कायदेशीर आदेशांशिवाय कारवाई करत नसाल तर तुम्ही डोनाल्ड ट्रम्प यांचं अकाउंट कसं काय ब्लॉक केलं? तुम्ही (ट्विटर) इतर देश आणि वंशांच्या लोकांच्या भावनांप्रति पुरेसे संवेदनशील नाही. जर हीच गोष्ट अन्य धर्माबाबत घडली असती तर तुम्ही अधिक सावधान आणि संवेदनशील असता, असे खडेबोल उच्च न्यायालयाने ट्विटरला सुनावले आहेत.
