पुन्हा एक अपघात… भरधाव रेती डंपरची झाडाखाली बसलेल्या दोघांवर धडक; ग्रामस्थांनी डंपर पेटवले; जळगाव जामोद तालुक्यात अवैध वाळू वाहतुकीकडे प्रशासनाचे दुर्लक्ष

MH 28 News Live : जळगाव जामोद : जळगाव जामोद तालुक्यात आज सकाळी एक गंभीर अपघात घडला. भरधाव वेगाने धावणाऱ्या वाळूच्या डंपरने झाडाखाली बसलेल्या दोन नागरिकांना चिरडले. या धक्कादायक घटनेमुळे परिसरात तणावाचे वातावरण निर्माण झाले असून, संतप्त ग्रामस्थांनी अपघातग्रस्त डंपर पेटवून दिला.

वारंवार अपघात, प्रशासनाची कुचकामी भूमिका

तालुक्यात वाळू वाहतूक करणारे डंपर आणि ट्रॅक्टर दिवसेंदिवस बेफाम वेगाने धावत असून, त्यामुळे अपघातांच्या घटनांमध्ये वाढ होत आहे. अवैध गौण खनिज वाहतुकीच्या या साखळीला आळा बसत नसल्याचे चित्र आहे. अवघ्या पंधरा दिवसांपूर्वी माऊली फाट्यावर अशाच अपघातात दोन बालके व त्यांच्या आजीचा मृत्यू झाला होता. त्यानंतरही कोणतीही ठोस कारवाई झाली नसल्याने नागरिकांमध्ये रोष वाढत आहे.

झाडाखाली बसलेल्या दोघांना गंभीर दुखापत

आज सकाळी मानेगावहून येणाऱ्या डंपरवरील चालकाचे नियंत्रण सुटले आणि दादुलगाव बसस्थानक परिसरात झाडाखाली बसलेल्या काशिनाथ झाल्टे (वय ४०) व समाधान काळे (वय ५५) या दोघांवर डंपर घुसला. या अपघातात ते गंभीर जखमी झाले असून त्यांच्यावर खामगाव येथील रुग्णालयात उपचार सुरू आहेत.

नागरिकांचा संताप उफाळला, डंपर पेटवला

या दुर्घटनेनंतर घटनास्थळी जमलेल्या ग्रामस्थांनी संतप्त प्रतिक्रिया व्यक्त केली. अपघातग्रस्त डंपरला त्यांनी पेटवून दिले. मागील घटनांनंतरही कोणतीही कारवाई झाली नसल्यामुळे नागरिकांमध्ये नाराजीचा सूर आहे. भरधाव वाहनांवर नियंत्रण आणण्यासाठी आणि बेकायदेशीर वाळू वाहतूक रोखण्यासाठी ठोस उपाययोजना कराव्यात, अशी जोरदार मागणी आता होत आहे.