म्हशी चारणारा अयान राष्ट्रीय बाँल बँडमिंटन स्पर्धेत चमकला. चेन्नईत झालेल्या राष्ट्रीय स्पर्धेत केली उत्कृष्ट कामगिरी

MH 28 News Live, चिखली : कुटुंबाचा पारंपरिक व्यवसाय सांभाळत, घरच्यांना मदत करत शिक्षण घेणाऱा युवक आपल्या मेहनतीने राज्याच्या सीमा ओलांडून परप्रांतात थेट तामिळनाडूची राजधानी असलेल्या चेन्नईमध्ये क्रीडा क्षेत्रामध्ये चमकला. चिखलीच्या एस. पी. एम महाविद्यालयात शिकणारा अयान रायलीवाले हा विद्यार्थी बाँल बँडमिंटन खेळाच्या राष्ट्रीय स्पर्धेत चेन्नईत येथे खेळला. त्याचा संघ या स्पर्धेत उपांत्य फेरीपर्यंत पोहचला . या उपलब्धीबद्दल सामाजिक कार्यकर्ते दत्ता महाले यांनी त्याचा कौटुंबिक सत्कार करून अभिनंदन केले.

येथील संभाजी नगर भागातील रहिवासी असलेला, तात्यासाहेब महाजन कला व वाणिज्य महाविद्यालयात शिक्षण घेणारा आयान मन्नान रायलीवाले हा मुस्लिम गवळी कुटुंबामध्ये मधील आहे. म्हशी पाळणे व दुग्ध व्यवसाय करणे हे त्यांचे पारंपारिक उदरनिर्वाहाचे साधन आहे. आपल्या अल्पशिक्षित आई – वडिलांना या कामात मदत करणाऱ्या अयानला कित्येकदा म्हशींना चारण्यासाठी रानावनात भटकावे लागते. हे सर्व करत असतानाच शिक्षणाची ओढ देखील त्याला स्वस्थ बसू देत नव्हती आणि शिक्षण घेताना त्याला खेळाचे आकर्षण निर्माण झाले. बॉल बॅडमिंटन या खेळांमध्ये तो अमरावती विद्यापीठाच्या संघात निवडला गेला. अमरावती विद्यापीठाच्या संघामध्ये प्रतिनिधित्व करत असतानाच राष्ट्रीय पातळीवरील स्पर्धेमध्ये खेळण्याची संधी त्याला मिळाली. चेन्नई येथे पार पडलेल्या या स्पर्धेच्या उपांत्य फेरीपर्यंत अमरावती विद्यापीठाच्या संघाने धडक मारली. या संघामध्ये अयानचा देखील समावेश होता. त्याने आपल्या उत्कृष्ट खेळाचे प्रदर्शन या स्पर्धेदरम्यान घडवले. या मिळालेल्या उपलब्धी बद्दल स्थानिक सामाजिक कार्यकर्ते दत्ता महाले यांनी त्याचा दिनांक १७ मार्च रोजी कौटुंबिक सत्कार केला. अयानच्या या यशाबद्दल त्याचे मित्र परिवार व चाहत्यांकडून त्याचे कौतुक होत आहे. ग्रामीण भागातील मुलांनी खेळांमध्ये असाच नावलौकिक मिळवावा अशी अपेक्षा व्यक्त होत आहे.