” सहकाराच्या नावाखाली स्वाहाकार करणाऱ्यांना पायउतार करा ” खा. प्रतापराव जाधवांचा हल्लाबोल, श्वेताताईंनीही डागली तोफ…. चिखली बाजार समिती निवडणूक प्रचार शिगेला पोहोचला

MH 28 News Live, चिखली : बुलढाणा जिल्ह्यातील अग्रेसर व घाटावरील सर्वात मोठी कृषी उत्पन्न बाजार समिती म्हणून लौकिक असलेल्या चिखली बाजार समितीमध्ये बेसुमार भ्रष्टाचार करून सहकाराच्या नावाखाली स्वाहाकार करणाऱ्या शेतकरी विरोधी कंपूला या निवडणुकीत सत्तेतून पायउतार करा आणि सहकार परिवर्तन पँनलला विकासाची संधी द्या असे आवाहन खा. प्रतापराव जाधव यांनी केले. चिखली एमआयडीसीमध्ये २८ एप्रिलला आयोजित शेतकरी मेळाव्यात मार्गदर्शन करताना ते बोलत होते. यावेळी आ. श्वेताताई महाले यांच्यासह महायचतीचे नेते मंचावर उपस्थित होते.

परिस्थिती बदलण्यासाठी परिवर्तन करा – खा. जाधव

बुलढाणा जिल्ह्यातील घाटावरच्या भागात असलेल्या बुलढाणा, चिखली, मेहकर, लोणार आणि देऊळगाव राजा यापैकी सर्वाधिक शेतमालाची आवक होणारी व सर्वाधिक श्रीमंत बाजार समिती म्हणून चिखली कृषी उत्पन्न बाजार समितीचा लौकिक संपूर्ण जिल्ह्यात आणि जिल्हा बाहेरही होता. परंतु, मागील दहा वर्षांमध्ये येथे असलेल्या सत्ताधाऱ्यांनी या बाजार समितीत मोठ्या प्रमाणावर भ्रष्टाचार आणि गैरकारभार केल्यामुळे चिखली बाजार समितीची अतिशय दयनीय अवस्था झाली, या बाजार समितीवर भले मोठे कर्ज असून येथील कर्मचाऱ्यांचे अनेक महिन्यांपासून पगार देखील निघाले नसल्याचे खा. प्रतापराव जाधव म्हणाले. ही परिस्थिती बदलण्यासाठी, चिखली बाजार समितीमध्ये शेतकऱ्यांना सर्व सोयी सुविधा उपलब्ध होण्यासाठी तसेच बाजार समितीवरील कर्ज फेडून कर्मचाऱ्यांचे पगार नियमित व्हावे यासाठी सहकार विकास पॅनलला विजयी करण्याचे आवाहन खा. जाधव यांनी या प्रसंगी केले.

गतवैभव प्राप्त करून देण्यासाठी सहकार परिवर्तन पँनल वचनबद्ध – आ. महाले

आ. श्वेताताई महाले यांनी देखील आपल्या भाषणातून चिखली बाजार समितीमध्ये गेल्या दहा वर्षात भ्रष्टाचार करणाऱ्यांवर कठोर शब्दांमध्ये टीका केली. दरवर्षी सेसद्वारे सुमारे दोन कोटी रुपयांचे उत्पन्न शेतकऱ्यांकडून मिळवणाऱ्या. या बाजार समितीच्या संचालक मंडळाने शेतकऱ्यांच्या मूलभूत सोयीसुविधांचा कधीही आस्थेने विचार केला नाही आणि त्या उपलब्ध करून दिल्या नाहीत याउलट कोट्यवधी रुपयांचा अपहार करून संस्थेला कर्जबाजारी बनवले व कर्मचाऱ्यांचे पगार थकवून त्यांना आर्थिक संकटात ढकलले असा जोरदार हल्ला आ. महाले यांनी आपल्या भाषणातून चढवला. चिखली बाजार समितीला गतवैभव पुन्हा प्राप्त करून देण्यासाठी सहकार परिवर्तन पॅनल वचनबद्ध असून शेतकऱ्यांना पुन्हा चांगले दिवस आणण्यासाठी सहकार परिवर्तन पॅनललाच विजयी करण्याचे आवाहन आ. श्वेताताई महाले यांनी यावेळी उपस्थित शेतकऱ्यांना केले. यावेळी भाजपचे जिल्हा उपाध्यक्ष डॉ प्रतापसिह राजपूत, अध्यक्ष शिक्षण प्रसारक मंडळ, रामकृष्णदादा शेटे, ज्येष्ठ नेते सुरेशअप्पा खबूतरे, शिवसेना उपजिल्हा प्रमुख शिवाजी देशमुख, शहर प्रमुख विलास घोलप आदी पदाधिकारी मंचावर उपस्थित होते.