पिकांनी साथ सोडली, कर्जाने घेरले; आकाशने जीवनयात्रा संपवली; रताळीत तरुण शेतकरीपुत्राची गळफास लावून आत्महत्या

MH 28 News Live / साखरखेर्डा : सिंदखेडराजा तालुक्यातील रताळी येथे कर्जबाजारीपणा, शेतीतील सातत्याने होणारे नुकसान आणि यंदाच्या पिकांच्या झालेल्या दारुण नापिकीच्या पार्श्वभूमीवर २६ वर्षीय युवा शेतकरी आकाश बळीराम पाटील याने आत्महत्या केल्याची हृदयद्रावक घटना २६ सप्टेंबर रोजी सकाळी उघडकीस आली. या घटनेने रताळी परिसरात हळहळ व्यक्त होत असून, दुष्काळसदृश परिस्थिती आणि शेतीतील वाढत्या संकटाने शेतकरी कुटुंबांसमोर उभ्या केलेल्या आर्थिक विवंचनेचा प्रश्न पुन्हा ऐरणीवर आला आहे.

आकाश पाटील यांच्या कुटुंबाकडे चार एकर शेती असून, याच शेतीच्या उत्पन्नावर कुटुंबाचा उदरनिर्वाह अवलंबून होता. मात्र शेतीतून मिळणारे उत्पन्न दिवसेंदिवस घटत गेल्याने घरचा खर्च भागविणेही कठीण झाले होते. त्यामुळे वडील बळीराम पाटील यांच्यासह आकाश आणि त्याचा भाऊ शेतीची कामे करून कुटुंबाला हातभार लावत होते. आई लक्ष्मीबाई यादेखील मोलमजुरी करून संसाराचा गाडा ओढण्यास मदत करीत होत्या. कुटुंबाच्या आर्थिक अडचणींमध्ये कृषी कर्जाची भर पडली. सन २०१९-२० मध्ये बळीराम पाटील यांनी भारतीय स्टेट बँकेकडून कृषी कर्ज घेतले होते. मात्र चार एकर शेतीतून अपेक्षित उत्पन्न मिळत नसल्याने कर्जाची नियमित परतफेड करणे शक्य झाले नाही. त्यातच व्याजाचा भार वाढत गेल्याने कर्जाचा डोंगरही वाढत राहिला. शासनाच्या कर्जमाफीच्या पहिल्या आणि दुसऱ्या याद्या जाहीर झाल्या असल्या तरी त्यामध्ये बळीराम पाटील यांचे नाव आले नसल्याचे कुटुंबीयांकडून सांगण्यात आले.

यंदा आकाशने विठ्ठल गायकवाड यांची दहा एकर शेती कसण्यासाठी घेतली होती. या जमिनीची मशागत करून सोयाबीन आणि तुरीची पेरणी करण्यात आली. जुलै महिन्यात झालेल्या समाधानकारक पावसामुळे सुरुवातीला पिकांची स्थिती चांगली होती. त्यामुळे यंदा तरी शेतीतून आर्थिक संकटाला काहीसा दिलासा मिळेल, अशी आशा कुटुंबाला होती. मात्र ऑगस्ट आणि सप्टेंबरमध्ये पावसाने मोठी दडी मारल्याने पिकांना निर्णायक टप्प्यावर पाणी मिळाले नाही. परिणामी हातातोंडाशी आलेली पिके करपून गेली. १० एकर शेतीवर सुमारे अडीच लाख रुपये खर्च करण्यात आला होता. सोयाबीनचे एकरी आठ ते दहा क्विंटल उत्पादन अपेक्षित असताना प्रत्यक्ष उत्पादन अत्यल्प राहिले. त्यामुळे केलेला उत्पादन खर्चही भरून निघणे कठीण झाले. एका बाजूला वाढते कर्ज, दुसऱ्या बाजूला पिकांची नापिकी आणि कुटुंबाच्या उदरनिर्वाहाची चिंता, अशा आर्थिक कोंडीत आकाश अडकला होता.

या पार्श्वभूमीवर आकाश सकाळी दूध काढण्यासाठी शेतात जात असल्याचे सांगून घराबाहेर पडला. सकाळी सुमारे सात वाजण्याच्या सुमारास राजू सरकटे हे शेतातील म्हशीचे दूध काढण्यासाठी जात असताना शेताच्या धुऱ्यावरील पळसाच्या झाडाला गळफास लावलेला आकाश मृतावस्थेत आढळून आला. घटनेची माहिती मिळताच ग्रामस्थांनी घटनास्थळी धाव घेतली.

आकाशचा चुलत भाऊ सागर परशुराम पाटील यांनी साखरखेर्डा पोलीस ठाण्यात तक्रार दाखल केली. पोलिसांनी पंचनामा करून मृतदेह उत्तरीय तपासणीसाठी ग्रामीण रुग्णालय, मेहकर येथे पाठविला. ठाणेदार युवराज रबडे यांच्या मार्गदर्शनाखाली पोलीस हेड कॉन्स्टेबल निवृत्ती पोफळे पुढील तपास करीत आहेत.

एका तरुण शेतकऱ्याच्या मृत्यूने केवळ एका कुटुंबाचा आधार हिरावला नाही, तर नापिकी, कर्जबाजारीपणा आणि अनिश्चित पावसाच्या दुष्टचक्रात अडकलेल्या ग्रामीण कुटुंबांच्या वाढत्या आर्थिक असुरक्षिततेचे विदारक वास्तव पुन्हा समोर आणले आहे.