गडकरींच्या त्या घोषणेचे मनसेने केले स्वागत; मलकापूर – बुलढाणा – चिखली महामार्गासाठी १२०० कोटींचा निधी

MH 28 News Live, चिखली : केंद्रीय दळणवळण मंत्री नितीन गडकरी यांनी NH – 753 मलकापूर – बुलढाणा – चिखली या राष्ट्रीय महामार्गासाठी १२०० कोटी रुपयांचा भरघोस निधी तत्वता मंजूर करत लवकरच काम सुरू होईल असे घोषित केले. हीच मागणी महाराष्ट्र नवनिर्माण सेनेचे जिल्हाध्यक्ष गणेश बरबडे यांनी दिनांक 8 मे रोजी सार्वजनिक बांधकाम विभागाकडे केले होते या मागणीची दखल केंद्रीय मंत्री गडकरी यांनी घेतल्यामुळे मनसेच्या वतीने गडकरी यांच्या घोषणेचे स्वागत करण्यात आले आहे.

महाराष्ट्र नवनिर्माण सेनेचे जिल्हाध्यक्ष गणेश बरबडे यांनी काढलेल्या प्रसिद्धी पत्रकात यासंदर्भात भूमिका मांडली आहे. चिखलीवरून मलकापूर जाणाऱ्या NH – 753 रस्त्यावर कायम वाहतुकीची वर्दळ असल्या कारणामुळे नेहमी या रस्त्यावर गर्दी होत असते त्यामुळे कायमच वाहतूकीस अडथळा निर्माण होतो. अनेक वेळा रस्ता अरुंद असल्यामुळे अपघात सुद्धा घडतात त्यामुळे महाराष्ट्र नवनिर्माण सेना बुलढाणा जिल्ह्याच्या वतीने जिल्हाध्यक्ष गणेश बरबडे व त्यांच्या सहकाऱ्यांनी दि. ८ मे रोजी चिखली ते मलकापूर NH – 753 या प्रमुख महामार्गाचे चौपदरीकरण करण्याबाबत कार्यकारी अभियंता सार्वजनिक बांधकाम विभाग बुलढाणा यांना निवेदन देण्यात आले होते. केंद्रीय दळणवळण मंत्री नितीन गडकरी यांनी काही दिवसांपूर्वी खामगाव येथे झालेल्या कार्यक्रमात या मार्गाबद्दलची घोषणा केली त्यामुळे मनसेच्या या मागणीची दखल घेतल्याचे पत्रकात म्हटले आहे. आपण केलेल्या मागणी अनुसरून ना. गडकरी यांनी सदर राष्ट्रीय महामार्गाला १२०० कोटी रुपयांचा निधी मंजूर केला त्यामुळे आपल्या मागणीला यश प्राप्त झाले असे गणेश बरबडे यांनी आपल्या प्रसिद्धी पत्रकात म्हटले आहे.