चिखली आणि जळगाव जामोद तालुक्यातील दोन तलाठ्यांचा पराक्रम पाहा… बनावट नुकसानग्रस्त शेतकरी दाखवून कोट्यवधींचा निधी हडपला; आर्थिक गुन्हे शाखेने घेतले तिघांना ताब्यात

MH 28 News Live / चिखली : नैसर्गिक आपत्तीमुळे होणाऱ्या नुकसानीपोटी सरकारकडून शेतकऱ्यांना भरपाई मिळते त्यानुसार अतिवृष्टी किंवा अवकाळी पावसामुळे शेतातील पिकांचे नुकसान झाल्यास प्रशासनाकडून पंचनामे करून भरपाई देण्यात येत असते. याच प्रक्रियेतून अतिवृष्टीमुळे शेतातील पिकाचे नुकसान झाल्याने शासनाकडून शेतकऱ्यांना नुकसानीची मदत जाहीर करण्यात आली होती. असे असताना बनावट शेतकरी दाखवून शासनाकडून येणारा कोट्यवधींचा निधी तलाठ्यांनी मिळून लाटल्याचा प्रकार चिखली आणि जळगाव जामोद तालुक्यातून समोर आला आहे.

गेल्या वर्षी जिल्ह्यातील जळगाव जामोद व संग्रामपूर तालुक्यात अतिवृष्टी झाली होती. त्यात अनेकांच्या शेतातील पिके वाहून गेली तर काहीच्या शेती खरडून गेल्या होत्या. संग्रामपूर आणि जळगाव जामोद तालुक्यात अतिवृष्टीमुळे मोठ्या प्रमाणात नुकसान झाले होते. या नुकसानीमुळे दोन्ही तालुक्यातील शेतकऱ्यांना अतिवृष्टीची मदत देण्यात येणार होती. यासाठी तलाठ्यांकडून नुकसानग्रस्त शेतकऱ्यांची नावे मागविण्यात आली होती. मात्र तलाठी उमेश बिल्लेवार, तलाठी अनंता माठे यांनी नुकसानग्रस्त बनावट शेतकरी उभे करून त्यांची नावे शासनाकडे पाठविण्याचा कारनामा केला होता. यात कोट्यवधीची अतिवृष्टीची मदत लाटल्याचे उघड झाले होते. तलाठी उमेश बिल्लेवार, तलाठी अनंता माठे व संगणक चालक महादेव पाटील या तिघांनी एका ठिकाणी बसून नुकसानीचे सर्व्हे करीत जे शेतकरी नाहीत त्यांच्या नावाने कोट्यावधी रुपये शासनाकडून वसुल केले होते.

पैसे हडपण्यासाठी केला फक्त कागदावर सर्व्हे

आरोपी तलाठी उमेश बिल्लेवार, तलाठी अनंता माठे व संगणक चालक महादेव पाटील या तीन महाठगानी एका ठिकाणी बसून नुकसानीचे सर्व्हे फक्त कागदावर केले. या प्रकारातून त्यांनी जे शेतकरी नाहीत; त्यांच्या नावाने कोट्यावधी रुपये शासनाकडून उकळले.

चार महिने होते फरार

जळगाव जामोद येथील तत्कालीन तहसीलदार शीतल सोलट यांनी हा घोटाळा उघडकीस आणला होता. यानंतर त्यांनी याबाबत पोलिसात तक्रार दिली होती. आपल्या विरुद्ध पोलीस तक्रार झाल्याचे कळताच हे तिन्ही आरोपी ऑगस्ट महिन्यापासून फरार होते. मात्र चिखली तालुक्यातील रानंत्री येथून आरोपी तलाठी अनंता माठे याला ताब्यात घेतले. तर खामगाव मधून तलाठी आरोपी उमेश बिल्लेवार तर जळगाव जामोद मधून कॉम्प्युटर ऑपरेटर महादेव पाटील याला ताब्यात घेण्यात आले आहे. आता या प्रकरणी आर्थिक गुन्हे शाखेच्या पोलिसांनी अटक केल्यानंतर पुढील चौकशी सुरु आहे.