खंडाळा ग्रामपंचायतीत सरपंचांविरोधात अविश्वास ठराव मंजूर! ८ विरुद्ध २ मतांनी ठराव पारित
MH 28 News Live / चिखली : ग्रामपंचायत खंडाळा मकरध्वजच्या सरपंच सौ. उज्वला पुरुषोत्तम जाधव यांच्याविरोधात दाखल करण्यात आलेला अविश्वास प्रस्ताव सोमवारी झालेल्या विशेष सभेत मंजूर झाला. अविश्वास प्रस्तावाच्या बाजूने ८ सदस्यांनी, तर विरोधात २ सदस्यांनी मतदान केल्याने सरपंचांविरोधातील प्रस्ताव पारित झाला.
ग्रामपंचायत सदस्य शेख जावेद शेख गुलाब यांच्यासह इतर सात ग्रामपंचायत सदस्यांनी सरपंचांविरोधात १ सप्टेंबर २०२६ रोजी अविश्वास प्रस्तावाची नोटीस दाखल केली होती. त्यानंतर या प्रस्तावावर चर्चा करण्यासाठी ७ सप्टेंबर रोजी दुपारी ३ वाजता ग्रामपंचायत कार्यालय, खंडाळा मकरध्वज येथे विशेष सभेचे आयोजन करण्यात आले.
तहसीलदार विजय सवडे यांच्या अध्यक्षतेखाली झालेल्या या विशेष सभेला सरपंचांसह ग्रामपंचायतीचे सर्व ९ सदस्य उपस्थित होते. म्हणजेच सरपंच आणि ९ ग्रामपंचायत सदस्य असे एकूण १० सदस्य सभेला उपस्थित होते.
विशेष सभेत सरपंचांविरोधात दाखल करण्यात आलेल्या अविश्वास प्रस्तावावर सविस्तर चर्चा झाल्यानंतर प्रस्ताव मतदानासाठी मांडण्यात आला. यावेळी ८ सदस्यांनी हात वर करून अविश्वास प्रस्तावाच्या बाजूने, तर २ सदस्यांनी प्रस्तावाच्या विरोधात मतदान केले. त्यामुळे अविश्वास प्रस्तावाच्या बाजूने स्पष्ट बहुमत मिळाले. मुंबई ग्रामपंचायत अधिनियम, १९५८ मधील कलम ३५ (३) अन्वये अविश्वास प्रस्ताव पारित होण्यासाठी आवश्यक असलेल्या बहुमताची पूर्तता झाल्याने सरपंच सौ. उज्वला पुरुषोत्तम जाधव यांच्याविरोधातील अविश्वास ठराव पारित झाल्याचे घोषित करण्यात आले.
या निर्णयामुळे खंडाळा मकरध्वज ग्रामपंचायतीतील विद्यमान सत्तासमीकरणाला मोठा धक्का बसला असून, आता ग्रामपंचायतीच्या पुढील नेतृत्वाकडे ग्रामस्थांचे लक्ष लागले आहे. अविश्वास ठरावानंतर ग्रामपंचायतीच्या राजकीय घडामोडींना वेग येण्याची शक्यता असून, पुढील काळात सरपंचपदाची सूत्रे कोणाकडे जाणार, याबाबत गावात चर्चेला उधाण आले आहे.
