अल्पवयीन मुलीचा विवाह व प्रस्तुती पाच जणांवर पुन्हा दाखल

MH 28 News Live / जळगाव जामोद : तालुक्यातील एका छोट्याशा गावात समाज हादरवून सोडणारी घटना उघडकीस आली आहे. अवघ्या १७ वर्षे ६ महिन्यांच्या अल्पवयीन मुलीचा विवाह केल्याची आणि त्यानंतर तिच्या गर्भधारणेची धक्कादायक माहिती समोर आली आहे. या प्रकरणाने बालविवाह प्रतिबंधक कायद्याचे आणि अल्पवयीन मुलींच्या सुरक्षेचे प्रश्न पुन्हा एकदा अधोरेखित केले आहेत.

मिळालेल्या माहितीनुसार, अल्पवयीन मुलीचा विवाह काही महिन्यांपूर्वी तिच्या नातेवाईकांच्या उपस्थितीत करण्यात आला होता. विवाहानंतर अल्पवयीन मुलगी गर्भवती झाल्याचे लक्षात येताच तिला वैद्यकीय उपचारासाठी शासकीय रुग्णालयात दाखल करण्यात आले. तेथील डॉक्टरांनी स्थिती गंभीर असल्याने तिला अकोला येथील रुग्णालयात हलविण्याचा सल्ला दिला. अखेर अकोला येथे अल्पवयीन मुलीने एका मुलाला जन्म दिला.

प्रसूतीदरम्यान ही घटना उघड झाल्याने रुग्णालय प्रशासनाने तत्काळ पोलिसांत तक्रार नोंदवली. या तक्रारीवरून मुलीचे आई-वडील, तिचा पती तसेच विवाहात सहभागी असलेल्या काही नातेवाईकांविरुद्ध एकूण पाच जणांवर गुन्हा दाखल करण्यात आला आहे.

या प्रकरणामुळे संपूर्ण परिसरात संताप आणि खळबळ उडाली असून बालविवाहाच्या घटनांकडे समाजाने गांभीर्याने पाहण्याची गरज पुन्हा अधोरेखित झाली आहे. पोलीस या प्रकरणाचा पुढील तपास करीत आहेत.