WhatsApp युझर्ससाठी मोठा धक्का ! १ ऑक्टोबरपासून ‘या’ मेसेजसाठी मोजावे लागणार पैसे व्हॉट्सॲपने बदलले नियम; मोफत उत्तर देण्याची सुविधा आता होणार बंद !
MH 28 News Live : जर तुम्ही व्यवसायासाठी व्हॉट्सॲपचा वापर करत असाल, तर ही बातमी तुमच्यासाठी खूप महत्त्वाची आहे. १ ऑक्टोबर २०२६ पासून ‘व्हॉट्सॲप बिझनेस प्लॅटफॉर्म’ (WhatsApp Business Platform API) वापरणाऱ्या कंपन्या आणि व्यावसायिकांना मोठा खर्च करावा लागणार आहे. कंपनीची मालक असलेल्या ‘मेटा’ (Meta) ने आतापर्यंत मोफत असणाऱ्या ‘सर्व्हिस मेसेज’वर (Service Messages) प्रति-मेसेज शुल्क आकारण्याचा निर्णय घेतला आहे.
नेमका काय बदल झाला आहे ?
पूर्वी काय होते? जेव्हा एखादा ग्राहक व्हॉट्सॲपवर व्यवसायाला मेसेज करायचा, तेव्हा पुढील २४ तासांत त्याला दिलेले उत्तर (सर्व्हिस मेसेज) पूर्णपणे मोफत असायचे.
आता काय होणार ?
१ ऑक्टोबरपासून ग्राहकाच्या मेसेजला उत्तर देताना (मग ते उत्तर मानवी प्रतिनिधीने दिलेले असो किंवा AI ने) प्रत्येक मेसेजसाठी पैसे द्यावे लागतील.
३० सप्टेंबरपर्यंत पेमेंट पद्धत जोडणे गरजेचे
मेटाने बिझनेस प्लॅटफॉर्म वापरणाऱ्या सर्व व्यावसायिकांना ३० सप्टेंबर २०२६ पर्यंत आपल्या खात्याला पेमेंट पद्धत (Payment Method) जोडण्यास सांगितले आहे. जर ३० सप्टेंबरपर्यंत पेमेंट पर्याय जोडला नाही, तर १ ऑक्टोबरपासून ग्राहकांना तुमचे मेसेज जाणे बंद होईल.
भारतात किती असणार खर्च ?
रुपयांमध्ये बिलिंग: भारतातील व्यावसायिकांचे बिल थेट भारतीय रुपयांमध्येच (INR) तयार होईल.
दर रचना: सर्व्हिस मेसेजसाठी लागणारे दर हे सध्याच्या युटिलिटी (Utility) आणि ऑथेंटिकेशन (Authentication/OTP) मेसेजच्या दरांनुसारच असतील.
AI मेसेजसाठी वेगळा खर्च: मेटाच्या स्वतःच्या AI एजंटद्वारे जाणाऱ्या मेसेजसाठी १ ऑगस्टपासूनच टोकननुसार बिलिंग सुरू आहे. साधारण एका मेसेजसाठी ४ ते ५ सेंट (अंदाजे ३.५ ते ४.५ रुपये) खर्च येतो.
मेसेजचे २ प्रकार आणि नवीन बिलिंग
१ ऑक्टोबरनंतर व्यावसायिकांकडून जाणाऱ्या प्रत्येक उत्तर-मेसेजचे दोन प्रकार पडतील:
सर्व्हिस मेसेज: मानवी प्रतिनिधी किंवा इतर AI ने दिलेले उत्तर (यासाठी प्रति-मेसेज शुल्क).
मेटा बिझनेस एजंट मेसेज: मेटाच्या स्वतःच्या AI ने दिलेले उत्तर (यासाठी टोकननुसार शुल्क).
लक्षात ठेवा: एकाच मेसेजवर दोनदा शुल्क लागणार नाही. मात्र, एकाच चॅटमध्ये १ मार्केटिंग मेसेज, २ मेटा AI रिस्पॉन्स, १ सर्व्हिस रिस्पॉन्स आणि १ युटिलिटी मेसेज असल्यास एकूण ५ वेगळे चार्जेस लागू होतील.
सामान्य युझर्सवर काय परिणाम होणार ?
सामान्य युझर्स सुरक्षित: हा नियम फक्त API वापरणाऱ्या मोठ्या/मध्यम व्यवसायांसाठी आहे. सामान्य व्हॉट्सॲप आणि व्हॉट्सॲप बिझनेस ॲप (WhatsApp Business App) वापरणाऱ्या युझर्ससाठी व्हॉट्सॲप नेहमीप्रमाणे पूर्णपणे मोफत राहील.
जाहिरातींवरील मेसेज: जर ग्राहक फेसबुक किंवा इंस्टाग्रामवरील जाहिरातीवरून (Click-to-WhatsApp) आला असेल, तर त्या मोफत विंडोतील मेसेज डिलिव्हरी पूर्वीप्रमाणेच मोफत राहील.
