एकाच नावावर अनेक SIM ठेवणाऱ्यांनो सावधान ! केंद्राच्या नव्या नियमाने अतिरिक्त नंबर होणार बंद
MH 28 News Live : वाढत्या सायबर गुन्हेगारीला आळा घालण्यासाठी केंद्र सरकारच्या दूरसंचार विभागाने (DoT) मोबाईल SIM कार्डांच्या संख्येबाबत नियमांची अंमलबजावणी अधिक कडक केली आहे. एका व्यक्तीच्या नावावर निर्धारित मर्यादेपेक्षा अधिक मोबाईल कनेक्शन असल्यास अतिरिक्त SIM कार्डांवर कारवाई केली जाणार आहे. दूरसंचार कंपन्यांना केवळ कागदोपत्री पडताळणी न करता तांत्रिक पातळीवरही नियंत्रण यंत्रणा मजबूत करण्याचे निर्देश देण्यात आले आहेत.
एका नावावर किती SIM ठेवता येणार ?
दूरसंचार विभागाने १७ ऑगस्ट २०२६ रोजी जारी केलेल्या मार्गदर्शक तत्त्वांनुसार, देशातील बहुतांश भागात एका व्यक्तीच्या नावावर जास्तीत जास्त ९ मोबाईल कनेक्शन ठेवता येणार आहेत. जम्मू-काश्मीर, आसाम आणि ईशान्येकडील राज्यांसाठी ही मर्यादा ६ SIM कार्डांची आहे. विशेष म्हणजे, वेगवेगळ्या दूरसंचार कंपन्यांचे SIM कार्ड असले तरी ती सर्व कनेक्शन्स एकत्रितपणे निर्धारित मर्यादेत मोजली जाणार आहेत.
नवीन SIM घेण्यासाठी ग्राहकाने अर्ज केल्यास त्याच्या नावावर आधीपासून किती मोबाईल कनेक्शन आहेत, याची तपासणी केली जाणार आहे. निर्धारित मर्यादा पूर्ण झालेली असल्यास नवीन कनेक्शन देण्यास नकार दिला जाईल आणि त्याची माहिती ग्राहकाला स्पष्टपणे देणे कंपन्यांना बंधनकारक असेल. त्यामुळे नवीन SIM घेण्यापूर्वी आपल्या नावावर किती मोबाईल क्रमांक सुरू आहेत, याची खात्री करणे ग्राहकांसाठी महत्त्वाचे ठरणार आहे.
DIP प्लॅटफॉर्मवरून होणार डिजिटल पडताळणी
या नियमांच्या अंमलबजावणीसाठी दूरसंचार विभाग डिजिटल इंटेलिजन्स प्लॅटफॉर्म (DIP) चा वापर करणार आहे. या माध्यमातून विविध टेलिकॉम कंपन्यांकडील ग्राहकांच्या कनेक्शनची माहिती एकत्रितपणे तपासता येणार आहे. निर्धारित मर्यादेपर्यंत SIM असलेल्या ग्राहकांचे प्रतिनिधिक फोटोही DIP वर उपलब्ध करून देण्याची प्रक्रिया सुरू करण्यात आली आहे.
नवीन SIM देताना ग्राहकाची ओळख आणि उपलब्ध कनेक्शनची माहिती तपासली जाणार असल्याने मर्यादेपेक्षा अधिक SIM घेण्याचा प्रयत्न तांत्रिक पातळीवर रोखता येणार आहे. दूरसंचार कंपन्यांना ३० नोव्हेंबर २०२६ पर्यंत त्यांच्या प्रणाली आणि प्रक्रियांचे DIP सोबत पूर्णपणे एकात्मिकीकरण करण्याचे निर्देश देण्यात आले आहेत.
तपासणीत एखाद्या ग्राहकाच्या नावावर निर्धारित मर्यादेपेक्षा अधिक SIM सक्रिय झाल्याचे आढळल्यास अतिरिक्त कनेक्शन एका दिवसाच्या आत निलंबित करण्याची तरतूद करण्यात आली आहे. बनावट कागदपत्रांच्या आधारे एकाच व्यक्तीच्या नावावर मोठ्या प्रमाणात SIM कार्ड सक्रिय करून सायबर गुन्हे, फसवणूक किंवा इतर गैरप्रकार केले जात असल्याच्या पार्श्वभूमीवर ही यंत्रणा महत्त्वाची मानली जात आहे. त्यामुळे नागरिकांनी आपल्या नावावर अनधिकृतपणे कोणतेही मोबाईल कनेक्शन सुरू आहे का, याची नियमित तपासणी करणे आवश्यक ठरणार आहे.
