धनंजयभाई देसाई यांची निर्दोष मुक्तता हा सत्याचा विजय – हिंदु राष्ट्र सेनेचे जिल्हा प्रमुख विजय पवार यांची प्रतिक्रिया

MH 28 News Live, चिखली : पुण्यातील मोहसीन शेख हत्याप्रकरणी हिंदु राष्ट्र सेनेचे अध्यक्ष धनंजयभाई देसाई यांच्यासह सर्व २० आरोपींची निर्दोष मुक्तता करण्यात आली. पुणे न्यायालयाच्या या निर्णयामुळे बुलढाणा जिल्ह्यातील हिंदु राष्ट्र सेनेच्या कार्यकर्त्यांमध्ये आनंद व्यक्त होत आहे. हा हिंदुत्वाचा विचार व सत्याचा विजय असल्याची प्रतिक्रिया हिंदु राष्ट्र सेनेचे जिल्हा प्रमुख विजय पवार यांनी व्यक्त केली आहे.

नऊ वर्षांपूर्वी पुणे येथे मोहसीन शेख या अभियंत्याची हत्या झाली होती. या प्रकरणी हिंदु राष्ट्र सेनेचे संस्थापक धनंजयभाई देसाई यांच्यासह २३ जणांना अटक करण्यात आली होती. देसाई यांना याबद्दल दोन वर्षांचा कारावास देखील भोगावा लागला. पुणे जिल्हा सत्र न्यायालयाने सबळ पुराव्यांअभावी या प्रकरणातून त्यांची निर्दोष मुक्तता केली. छत्रपती शिवाजी महाराज आणि शिवसेनाप्रमुख बाळासाहेब ठाकरे यांचे काही आक्षेपार्ह छायाचित्रे ‘फेसबूक’द्वारे प्रसारित केल्यामुळे २ जून २०१४ या दिवशी पुण्यातील हडपसर भागात दंगल झाली होती. त्या वेळी माहिती आणि तंत्रज्ञान (आयटी) क्षेत्रातील अभियंता असलेला मोहसीन शेख याची जमावाने हत्या केली होती. या प्रकरणी पोलिसांनी हिंदु राष्ट्र सेनेचे अध्यक्ष धनंजय देसाई यांच्यासह २३ जणांना येरवड्यातून अटक केली होती. वर्ष २०१९ मध्ये धनंजय देसाई यांना मुंबई उच्च न्यायालयाने जामीन समंत केला होता. धनंजयभाई देसाई यांच्या बाजूने आलेला निकाल हा हिंदुत्वाचा विचार व सत्याचा विजय असल्याची प्रतिक्रिया हिंदु राष्ट्र सेनेचे जिल्हा प्रमुख विजय पवार यांनी व्यक्त केली आहे.