जिल्हा शिक्षक गौरव पुरस्कारासाठी २१ शिक्षकांचे प्रस्ताव दाखल

MH 28 News Live / बुलढाणा : शिक्षक दिनाचे औचित्य साधून जिल्हा परिषदेच्या वतीने दरवर्षी देण्यात येणाऱ्या जिल्हा शिक्षक गौरव पुरस्कार निवडीची प्रक्रिया यंदाही सुरू झाली आहे. त्यानुसार नुकत्याच २१ शिक्षकांच्या मुलाखतींचा टप्पा पूर्ण झाला. या शिक्षकांमध्ये १८ प्राथमिक तर ३ माध्यमिक शाळांतील शिक्षकांचा समावेश आहे.

जिल्हा परिषदेचे मुख्य कार्यकारी अधिकारी गुलाब खरात यांच्या अध्यक्षतेखाली मुलाखती पार पडल्या. शिक्षकांच्या शैक्षणिक कामगिरीसोबतच त्यांच्या विद्यार्थ्यांवर झालेला परिणाम, शैक्षणिक पद्धतींमध्ये केलेली नावीन्यपूर्ण प्रयोगशीलता आणि सामाजिक कार्यातील सहभाग या बाबींचा विशेष विचार या प्रक्रियेत करण्यात आल्याचे कळते.

दरवर्षी ५ सप्टेंबर रोजी शिक्षक दिनानिमित्त शिक्षणक्षेत्रात उल्लेखनीय योगदान देणाऱ्या शिक्षकांचा सन्मान करण्याची परंपरा जिल्हा परिषद राबवत आली आहे. यामधून शिक्षकांचा उत्साह वृद्धिंगत होतो तसेच विद्यार्थ्यांच्या भविष्यासाठी सातत्याने कार्यरत राहण्यास प्रोत्साहन मिळते.

आगामी शिक्षक दिनी होणाऱ्या मुख्य कार्यक्रमात यावर्षीच्या जिल्हा शिक्षक गौरव पुरस्कार विजेत्यांची घोषणा करण्यात येणार आहे. त्यामुळे शिक्षक व शिक्षण क्षेत्राशी संबंधित वर्तुळांत याबाबत उत्सुकता निर्माण झाली आहे.