डोणगावात अवैध दारूविक्रीचा सुळसुळाट; हॉटेल-धाबे बनले मद्यपींचे अड्डे ! नकली विदेशी दारूच्या विक्रीचीही चर्चा; राज्य उत्पादन शुल्क विभागाच्या भूमिकेवर नागरिकांचे प्रश्नचिन्ह

MH 28 News Live / डोणगाव : मेहकर तालुक्यातील महत्त्वाची बाजारपेठ म्हणून ओळखल्या जाणाऱ्या डोणगाव व परिसरात अवैध दारूविक्रीचा व्यवसाय खुलेआम सुरू असल्याचा आरोप स्थानिक नागरिकांकडून केला जात आहे. परिसरातील काही हॉटेल्स आणि महामार्गावरील धाब्यांवर परवान्याविना मद्यविक्री होत असल्याची चर्चा असून, या प्रकारामुळे कायदा व सुव्यवस्थेचा प्रश्न निर्माण झाला आहे. विशेष म्हणजे, नामांकित कंपन्यांच्या ब्रँडच्या नावाखाली नकली विदेशी दारूची विक्री होत असल्याचीही चर्चा नागरिकांमध्ये रंगत आहे. या प्रकाराची अधिकृत पडताळणी होणे आवश्यक असून, मद्याच्या गुणवत्तेबाबतही चिंता व्यक्त केली जात आहे.

डोणगाव परिसरातील काही हॉटेल्स आणि धाब्यांवर दिवसाढवळ्या मद्यविक्री होत असल्याचा आरोप आहे. काही ठिकाणी ग्राहकांना जागेवरच मद्य उपलब्ध करून दिले जात असल्याची माहिती स्थानिकांकडून समोर येत आहे. परिणामी, अशा ठिकाणी मद्यपींची गर्दी वाढत असून, परिसरातील सामाजिक वातावरणावर त्याचा परिणाम होत असल्याची तक्रार नागरिक करीत आहेत. विशेषतः हॉटेल्स आणि धाब्यांच्या परिसरातून ये-जा करणाऱ्या महिला, मुली तसेच शाळकरी विद्यार्थिनींच्या सुरक्षिततेचा प्रश्नही ऐरणीवर आला आहे. सार्वजनिक ठिकाणी होणाऱ्या अशा प्रकारांवर नियंत्रण ठेवण्याची मागणी
होत आहे.

अवैध दारूविक्री रोखण्याची जबाबदारी राज्य उत्पादन शुल्क विभागाची असताना हा व्यवसाय सुरू कसा राहतो, असा सवाल उपस्थित केला जात आहे. संबंधित विभागाच्या अधिकाऱ्यांकडून नियमित तपासणी आणि कारवाई केली जाते का, कारवाई होत असल्यास त्याचा परिणाम का दिसत नाही, असे प्रश्न नागरिक विचारत आहेत. काही नागरिकांनी तर अवैध व्यावसायिक आणि संबंधित विभागातील अधिकारी यांच्यात आर्थिक साटेलोटे असल्याचा गंभीर आरोप केला आहे. मात्र, या आरोपांची अधिकृत पुष्टी झालेली नसून, वरिष्ठ अधिकाऱ्यांनी स्वतंत्र चौकशी करून वस्तुस्थिती स्पष्ट करावी, अशी मागणी होत आहे.

दरम्यान, नकली विदेशी दारूच्या विक्रीची चर्चा अधिक चिंताजनक ठरत आहे. नामांकित ब्रँडच्या नावाने बनावट मद्य विकले जात असल्याचे आरोप खरे असल्यास हा केवळ उत्पादन शुल्क कायद्याचा भंग नसून नागरिकांच्या आरोग्याशी संबंधित गंभीर प्रश्न आहे. बनावट किंवा भेसळयुक्त मद्यामुळे विषबाधा आणि जीवितहानी होण्याचा धोका नाकारता येत नाही. त्यामुळे संशयित ठिकाणांवरील मद्याचे नमुने घेऊन त्यांची प्रयोगशाळेत तपासणी करणे गरजेचे आहे.

डोणगावातील या कथित अवैध व्यवसायामुळे तरुण पिढी व्यसनाधीनतेच्या विळख्यात अडकण्याची भीती व्यक्त होत आहे. त्यामुळे जिल्हाधिकारी, पोलीस प्रशासन आणि राज्य उत्पादन शुल्क विभागाच्या वरिष्ठ अधिकाऱ्यांनी या प्रकरणाची तातडीने दखल घ्यावी, हॉटेल्स व धाब्यांची तपासणी करून दोषींवर कायदेशीर कारवाई करावी, तसेच विभागीय अधिकाऱ्यांच्या भूमिकेचीही चौकशी करावी, अशी मागणी सुजाण नागरिकांकडून होत आहे. आता प्रशासन या तक्रारींची दखल घेऊन प्रत्यक्ष कारवाई करणार की अवैध दारूविक्रीच्या तक्रारींकडे दुर्लक्ष कायम राहणार, याकडे डोणगावकरांचे लक्ष लागले आहे.