लोणार तालुक्यातील ३ विटभट्या सील; अनधिकृत अकृषक वसुली मोहीमेतकारवाई

MH 28 News Live : लोणार
अनधिकृत अकृषक वसुली मोहीमे अंतर्गत तहसीलदार सैपन नदाफ यांचे कडून वसुली राबवण्यात येत असून कोणत्याही प्रकारचा एन. ए. न करता व शासनाला अकृषक कर न भरता व्यवसाय करणाऱ्या आस्थापनांवर अकृषक साऱ्याची आकारणी व वसुली करण्यात येत आहे.

शासनाने दिलेले उद्धिष्ट मार्च २०२२ अखेर पूर्ण करायचे असल्याने महसूल विभागामार्फत मोहीम सुरू करण्यात आली आहे. या अंतर्गत लोणार तालुक्यातील मौजे पळसखेड, हिरडव व जांबुल शिवारात असणाऱ्या अनधिकृत वीटभट्यांवर तहसीलदार सैपन नदाफ यांनी आपल्या पथकासह जाऊन धडाकेबाज कार्यवाही केली. केलेल्या दंडाचा भरणा सदर वीट भट्टी चालकांनी विहित मुदतीत न केल्यामुळे सदर विट भट्टयातील तयार मालाची जप्ती करण्यात आली. संबधीत वीट भट्टी मालक व शेत मालक यांना दि. २१ मार्च पर्यंत दंड भरण्याची शेवटची संधी देण्यात आली असून दंड न भरल्यास सदर तयार माल दि. २२ मार्च रोजी जाहीर लिलाव करून त्या लिलावाच्या रकमेतून कराची वसुली शासन जमा करण्यात येईल तहसीलदार नदाफ यांनी दिली.

अनधिकृत अकृषक मोहीम अंतर्गत या आर्थिक वर्षात लोणार तालुक्यात एकूण ६३५ अस्थापनांना ४५ लक्ष रकमेच्या नोटिसा देण्यात आलेल्या असून या पैकी १६५ आस्थापना धारकांनी १० लक्ष ५ हजार ६५० रुपयाचा भरणा चलना द्वारे शासन जमा करण्यात आलेला आहे. ३१ मार्च २०२२ पूर्वी उर्वरित अस्थापना अकृषक कराचा भरणा करून घ्यावा अथवा सदर रकमेचा बोझा त्याच्या सातबारा वर चढवण्यात येईल व सदर रकमेची वसुली ही महाराष्ट्र् जमीन महसूल अधिनियम १९६६ चे कलम १७६,१८१ नुसार कार्यवाही करण्यात येईल; तरी सर्व संबंधितांनी नोटीस प्रमाणे अनधिकृत अकृषक दंडा चा भरणा हा वेळेवर करावा असे आवाहन तहसीलदार सैपन नदाफ यांनी एका लेखी प्रसिद्धी पत्रकाद्वारे केले आहे. तलाठी गावंडे, तुपकर, मानकर आदी कर्मचारी या कारवाईत सहभागी झाले होते.