युवकाच्या हत्येने मलकापुरात खळबळ; हत्येला प्रेमप्रकरणाचा अँगल

MH 28 News Live : बुलढाणा जिल्ह्यातील मलकापूर येथे कथित प्रेम प्रकरणातून एका युवकांची हत्या करण्यात आली. यात ‘त्या’ युवतींच्या भावाचा सहभाग असल्याचे प्रथमदर्शनी दिसून येते. प्रवीण अजाबराव संबारे (२७, राहणार बेलाड, तालुका मलकापूर, जिल्हा बुलढाणा ) असे मृत तरुणाचे नाव आहे. त्यांचा भाऊ सचिन संबारे याने दिलेल्या तक्रारीवरून मलकापूर पोलिसांनी गुन्हा दाखल केला आहे.पोलीस सूत्रांनी दिलेल्या माहितीनुसार प्रवीण संबारे हा दारू पिऊन बेशुद्ध अवस्थेत पडल्याची माहिती त्याच्या एका मित्राने प्रवीणच्या भावाला फोनवरून दिली. मिळालेल्या माहितीवरून प्रवीणचा भाऊ सचिन हा मलकापुरातील औद्योगिक प्रशिक्षण संस्थेच्या पाठीमागे पोहोचला. तिथे त्याला प्रवीण बेशुद्ध अवस्थेत दिसला. त्याला मलकापूर येथील खाजगी रुग्णालयात हलवले, त्यानंतर उपजिल्हा रुग्णालयात नेण्यात आले. मात्र डॉक्टरांनी प्रवीणला मृत घोषित केले.

मारेकऱ्यानेच केला फोन दरम्यान सर्व कायदेशीर सोपस्कार पर पडल्यावर प्रवीण याच्या मृतदेहवर अंत्यसंस्कार करण्यात आले. त्यानंतर सचिन याने आदल्या दिवशी रात्री आलेल्या फोनचे ‘कॉल रेकॉर्डिंग’वारंवार ऐकले. प्रवीण सोबत आदल्या दिवशी रात्री जो मित्र होता, ज्याने फोन करून प्रवीण बेशुद्ध अवस्थेत असल्याची माहिती दिली होती, त्यावरच प्रवीणच्या कुटुंबीयांचा संशय बळावला. कुटुंबीयांनी लगेच पोलीस ठाणे गाठत प्रवीण चा खून झाल्याचा संशय व्यक्त केला. पोलिसांनी वैभव गोपाळ सोनार (२१) याला चौकशीसाठी ताब्यात घेतले. आधी उडवा उडवीचे उत्तरे देणाऱ्या वैभवने नंतर प्रवीणच्या हत्येची कबुली दिली व खुनाचे कारणही सांगितले. मृतक प्रवीण हा वैभव च्या बहिणीवर प्रेम करत होता. त्यामुळे वैभवचे कुटुंब देखील त्रस्त होते. प्रवीणच्या या कृत्यला कंटाळूनच त्याचा काटा काढायचा विचार वैभवच्या डोक्यात आला. पोलिसांनी वैभव गोपाळ सोनार (२१, रा. तरोडा, ता. मुक्ताईनगर) याच्याविरुद्ध खुनाचा गुन्हा दाखल केला आहे.