बसची घंटी का वाजवली ? यावरून झाला होता पाच वर्षांपूर्वी वाद; महिला वाहकास मारहाण करणाऱ्या तिघांना सहा महिन्याचा कारावास

MH 28 News Live : बसची घंटी का वाजवली व बस थांबण्यावरून वाद होऊन काही लोकांनी बसमध्ये कार्यरत असणाऱ्या महिला वाहक कर्मचाऱ्याला मारहाण केल्याची घटना २०१८ मध्ये शहरातील जयस्तंभ चौकात घडली होती. याप्रकरणी जिल्हा व सत्र न्यायाधीश -२ बुलडाणा यांनी आज ३० जून रोजी निकाल देत, महिला वाहकास कर्तव्यावर असताना मारहाण तसेच शासकीय कामात अडथळा आणल्या प्रकरणी तीन आरोपींना सहा महिन्याची सश्रम कारावास व प्रत्येकी दोन हजार रुपये दंड अशी शिक्षा सुनावली.

याबाबत सविस्तर असे की, महाराष्ट्र राज्य परिवहन महामंडळ बुलडाणा आगारामध्ये लक्ष्मी हरिभाऊ बंड या वाहक पदावर कार्यरत होत्या. 31 मे 2018 रोजी लोणार ते बुलडाणा या बसमध्ये कर्तव्यावर असताना बसमधील प्रवास करणारे अशोक लक्ष्मण मगरे, मंदाबाई अशोक मगरे व जयश्री ज्ञानेश्वर माळी यांनी बसची घंटी वाजवली व बस थांब्यावरून वाद घालत वाहक लक्ष्मी बंड यांना मारहाण करून शिवीगाळ केली होती.

या प्रकाराची पोलिसात तक्रार झाल्यानंतर तिन्ही आरोपीवर विविध कलमाने गुन्हा दाखल करण्यात आला. प्रकरण न्यायप्रविष्ठ झाल्यानंतर विशेष सरकारी वकील अँड. संतोष खत्री यांनी सरकार पक्षाची बाजू मांडत.सर्व साक्षीदार तपासले आणि घडलेली हकीगत सिद्ध केली.

तिन्ही आरोपीवर गुन्हा सिद्ध झाल्यानंतर बुलडाणा जिल्हा व सत्र न्यायाधीश २ एस. बी. डीगे यांनी आरोपी अशोक मगरे, मंदाबाई मगरे व जयश्री माळी या तिन्हीही आरोपींना सहा महिने साश्रम कारावास व प्रत्येकी दोन हजार रुपये दंड अशी शिक्षा खोटावली.